Chóśebuz/Cottbus. „Mjazy serbskimi duchownymi mamy pó lěśe 1945 jano jadnogo serbskego fararja z takeju energiju a rěcneju a teologiskeju kompetencu, kenž jo njezmucnje serbske Bóže słowo prjatkował, pisał a śišćaś dał we wuběrnej dolnoserbskej rěcy“. Z tymi słowami jo Christina Kliemowa z Dešna spominała sobotu tyźeń na fararja Herberta Nowaka, kótaryž jo pśed pěś lětami wumrěł a něnto, kradu na 23. aprylu, by 100 lět stary był. Wóna jo we casu politiskego pśewrośenja iniciěrowała gibanje k zasejwótžywjenju serbskich namšow a pśi tom z fararjom Nowakom gromadu źěłała.