Mjazy tymi, ako su zapódali naraźenja za pśichodny wopon Rogozna, jo teke Ihlojc familija. Wopona, ako stej kresliłej nan Uwe a źowka Vanessa, stej wuslědk gromadnego familijowego wobradowanja. „To jo rědnje, gaž něco za wjas se cyni“, groni maś Heike.

Ihlojc familija se rada wobźělijo na wejsnem žywjenju a tam wjele cyni. Tak wótglědajomy raz wót woponoweje akcije: Teke serbske tradicije ako zapust a mólowanje serbskich jatšownych jajow raźi woplěwaju. Gromadne mólowanje jajow w Rogoznje su organizěrowali na iniciatiwu prědkstojaŕki Anke Schulzoweje rogozańske towaristwa a wejsna pśirada. We wejsnem domje abo tek raz w športaŕskem gósćeńcu jo se to pśewjadło w slědnych lětach. Za wše generacije jo to rědne tšojenje było, źiśi su mógali ku tej góźbje teke walkowaś. „To wšo w korona-casu kradu tšujoš“, woblutujo Heike Ihlowa, roźona Kaiserojc.