Pětk, 16. apryla, jo chóśebuski wušy šołta Holger Kelch (CDU) se z wejsneju pśiradu Rogozna wupórał na wobejźenje togo měsćańskego źěla. Wšake jo se woglědało a pśepowědało. Mjazy drugim: Pśidroze ku gmejnskemu domoju a k źiśowni stej mjaztym wótjězdźonej a dejtej se nowo wuflastrowaś. Wejsna pśirada jo teke pokazała na wjeliku notnosć, až dostanu busowy domcyk pśi wustanišću na B 168. Wóni se wjasele, až su dostali pśigrono wušeje šołty, až taki domcyk dej se lětosa natwariś.