Z Města/Cottbus. To góle, kótarež jo pśinjasło tu nejžlěpšu zemju za „bobowe wuběźowanje“, wordujo mytowane. Myto buźo dobropis z lody „Fidibus“ w Měsće na Mjadwjeźowej gasy. Tam móžo dobyśaŕ abo dobyśaŕka hyś se wótholit dobropis (Gutschein). Wón abo wóna móžo se wupytaś něco, což płaśi 25 euro. We tej loźe maju grajki za nutśi a za wence, za kužde starstwo a wěcy, z kótarymiž móžoš pśepytowaś rostliny abo se woglědaś insekty. Wjele grajkow su starodawne klasikarje. Muzikowe instrumentki, drastwy a šćerkotawy za góletka, gněśeńka a drjewjane grajki su pódla. Až wjele z drjewa maju, njejo pśipad: Wšak póchada góspodaŕka Grit Donner-Blumrodtowa z Rudnych górow. Wóttam ma teke młoge grajki na pśedań. Wóna wulicujo: „Ako som póroźiła prědne góle, som južo bydliła w Chóśebuzu. Som se žycyła, aby mója źowka grała z dobrymi drjewjanymi grajkami a se wopóznawała z tradicijami mójeje domownje. Tak jo pśišło, až som 1992 wótcyniła lodu ‚Fidibus‘. Nejpjerwjej jo loda była na Gołubjowej droze, smy pór razow pśeśěgnuli. Wót lěta 2017 jo ‚Fidibus‘ na Mjadwjeźowej gasy. Móje tśi źiśi su wótrosli z nim. Něnto su wóni wjelike.“