Z Janšojc/Jänschwalde. W Janšojcach su źiśi źiśownje „Lutki“ se tśi tyźenje dłujko z temu jatšownego casa a jogo nałogow zabrali. Co su jatšowny wogeń, jatšowny wóda, wóskowanje jajow a walkowanje jajow? Witaj-źiśi kupki „Liški“ něnt wěźe, až mamy na jsy w normalnem paźe „wjelicki wogeń“ za wšykne luźe abo małe wognje na dwórach.
Mimo togo wóni něnt teke znaju pšawidła walkowanja jajow. „Musyš druge jajo trjefiś a pón móžoš to kšadnuś. Pón maš dwě jaji“, jo wulicył Niklas (4 lět stary) z Drjejc. Ale smy změnili pšawidła a grajkali z pisanymi plastiskimi jajami. Ako myto źiśi teke njejsu dostali jaja, ale małe słodkosći. Zawěsće su kśěli wšykne źiśi, teke někotare z horta a z góletkownje, se wopytaś. W slědnem tyźenju pśed jatšami su źiśi, kenž su tśi až do šesć lět stare, samo wence na terenje źiśownje pó „jatšownu wódu“ šli. Gólcy su se napinali pśi wulěkanju źowćow; to jo było wjeliki špos. Togodla wšykne źowća su měli na kóńcu plapotatu wódu.