Lětosa smy we Nowem Casniku wó rogojskem zapusće pisali. Naš korespondent Horst Adam jo we swójom pśinosku na to pokazał, až bóžko njejsu byli lětosa žedne wót tych rogojskich kóšulow k wiźenjeju. Młogi by se źiwał, kak te žeńske a źowća na zapust du, gaž žedne kóšule woblacone njamaju. Ale Horst Adam jo měnił te kóšule originalneje rogojskeje serbskeje drastwy. Ze šyrokimi cerwjenymi a zelenymi smugami.
Rogow ga jo do pśesedlenja we susedstwje wót Mósta a Janšojc lažał, ale jo pśisłušał drugemu regionoju serbskeje drastwy. Zgromadnje z drugimi jsami póspóromje Nyse jo Rogow źěl drastwinego regiona wokoło Grodka. Tam na pśikład žednje njejsu měli lapu, ale mału hawbu. Jej su gronili w Rogowje „karneta“.