Gaby korona tak mócnje k nazymu njeby pśišła, ga by kśěł se hyšći raz z fararjom Puhlmannom w měsćańskej chórowni na tasu kafeja zmakaś. Škóda, až njejo z tym nic wěcej hordowało, chórownja ga jo była za hoglědarjow zacynjona. Weto cu se hyšći raz huźěkowaś fararjeju Berndoju Puhlmannoju. Wjele jo wón za nas cynił. Jo teke pśišeł na zakopowani mójeju starjejšeju. Jaden wjelgin sympatiski luź a pśijaśel.

Južo w 1980ych lětach jo młody Bernd ako student teologije k nam w Smogorjowjedo domu pśišeł. Wón ga jo gromaźe z mójim bratšom w Barlinju teologiju studěrował. Ako młody wjerbański wósadny faraŕ jo pózdźej źurja měškaŕnje (Küsterhaus) za nas wótcynił, ako smy tam Pónaschemu załožyli, ale teke za dalšne zmakanja. How jo se tencas teke skóńcyło slědne zmakanje Serskego blida z fararjom Klausom Lischewskim a teke to jo zasej faraŕ Bernd Puhlmann pódpěrował.