Z Města/Cottbus. Jogo slědna powołańska stacija jo zazdaśim nejwěcej napinajuca stacija była: Źěło, źož „se pali“. Tak to wopisujo faraŕ Bernd Puhlmann, kótaryž jo šesć a poł lět dušepastyŕ w chóśebuskej chórowni „Carl Thiem“ był, źož 1.200 póstolow jo. Wón jo se nadawk źělił z kolegoma, něnt se Puhlmann na wuměńk sednjo. Dušepastyŕstwo změjo pak nadalej městno w jogo žywjenju: Puhlmann buźo dalej zakopowaś źiśi, kótarež su njaboge na swět pśišli, ako „gwězdowe źiśi“ (Sternenkinder), we tej chórowni. Wón wóstanjo teke aktiwny w nuznem dušepastyŕstwje w Měśće a we wokrejsu Sprjewja-Nysa.