Z Chóśebuza/Cottbus. Dawno jo Město sebje nadobył wjelike mě, což nastupa wusměrjenje na mjazynarodnje wjelike sportowe zarědowanja. K nim słuša w prědnem rěźe swětowy cup w turnowanju ako kuždolětne zmakanje olympiskich dobyśarjow a swětowych mejstarjow we Łužyskej arenje. Ale 2021 njebuźo kopica fanow how žednu paradu nejlěpšych na swěśe dožywiś. Pśeto: Pó wótpowěźenju „Turněra mejstarjow“ musy organizaciski team turněrowego wjednika Mirka Wohlfahrta pśiduce wobtuženje pśenjasć.

W Nimskej njebuźo 2021 žeden turnowański swětowy cup. Za tym, až jo južo chóśebuski turněr mejstarjow ako jadnotliwy swětowy cup wótgronjony, su musali organizatory ideju wěcejwójowańskego swětowego cupa („Mehrkampf- Weltcup“) za to lěto zachyśiś. Dłujkolětny zarědowaŕ swětowego cupa jo pśespytował, lěc móžo Chóśebuz byś narownańske městno za pśewjeźenje wěcejwójowańskego swětowego cupa, kenž jo pópšawem w Stuttgarśe „doma“.