Z Gór/Guhrow. Hoffmanojc pjakaŕnja („Landbäckerei“) jo starodawna „institucija“ we jsy, někak w lěśe 1885 jo Karl Zimmer ju załožył. Mjaztym jo jogo pótomnik Sven Hoffmann ten „górjański pjakaŕ“. W loźe pśedawa Bianca Mušyna (Mucha), dalšna sobuźěłaśeŕka jo ducy z awtom a pśedawa klěb, guski a tykańc w serbskich jsach.
Hoffmann pjaco někak 120 pókšytow klěba wob źeń, a źaseś sortow guskow. Muka pśiźo z Bórkow, kwas sam pśigótujo. Klěb, to luźe kupuju raźi, guski how šmokuju a tykańc jo teke na pśedań. Wósebnosć jo, až Hoffmann pjaco twarožkowy tykańc (měnjony njejo twarogowy tykańc!), samo gaž njejo kuždy źeń. W loźe kryduju luźe wušej togo „Nowy Casnik“. Dalšne casniki njepśedawaju how wěcej.