Wó rozwiśe a zlažcenje burskego źěła na póli a we groźi su se prědk hundert lět starali rolnikaŕske towaristwa, Raiffeisenowa banka a burske sami ze swójeju kreatiwnosću, ga dej góspodaŕ na burskem dwórje byś mudry a wobstawny we swójom źěle. Krowy, kóze a wójce deje se pšawy cas futrowaś a dojś. Ale pšawe dojśe jo kumšt za sebje. Toś su rolnikaŕske towaristwa na jsach organizowali dojaŕske kurse.
Šulaŕ ma za swójo wucenje kridowu toflu, knigły a k pokazanju wšake eksponaty. Ale co ma dojaŕski mejstaŕ? Wón njamóžo krowu za demonstratiwny objekt trjebaś. Ta njama sćerpnosć a njelubujo, gaž ducent luźi jeje nejsensibelnjejšy źěl dwa tyźenja a štundy dłujko wobsmasajo. Dla tog su wunamakali gumijowu krowu. A ta jo we swójej jadnorosći a funkcionalnosći perfektna, ma wumje a teke styri nogi.