Tych „kreiselow“ pśi głownych a wažnych drogach bywa we Łužycy pśecej wěcej. Teke w Slěpem taki maju, bejnje wjeliki a teke z młogimi struskami a rostlinami cysty a naglědny. Wón pokažo awtam, motorskim a kólasowarjam drogu do Brězowki a dalej do Běłeje Wódy.

Pó njej se teke ja wupórajom do susedneje jsy. Za wušej kilomejtaŕ se na pšawem boce za bomami wupśestrěwajo wjelike a znate kupańske jazoro na kšomje Brězowki. Až do lěta 1968 běchu how we wuglowej jamje „Frieden“ brunicu wudobyli a z teje jamy jo nastało jazoro, něźi dwa kilomejtarja dłujke a 500 mejtari šyroke. 1982 jo było tak daloko. Z togo casa jo se wšo wuwiło k w cełej Sakskej wjelgin woblubowanemu centrumoju za kupanje, za wodychanje a kulturu. A pśecej wětše a šyrše to wšo buźo – w jazorje a kołowokoło njogo. Nowe domcyki za dowolarjow, gósćeńce, móžnosći za sportowanje a rozluštowanje a wjele drugego tam wiźiš, teke we wóźe.