To jo rědny nazymski źeń na kóńcu oktobra. Pšawy cas za drogowanje pó slěpjańskich stronach. Ze śěgom se toś wupórajom na drogu – nejpjerwjej do Grodka, pón dalej do Sakskeje, ga do Slěpego. Dokulaž stej to dwa kraja, trjebaš za tych něźi 50 kilomejtari dwa bileta.

Za 40 minutami som w Slěpem. Tamne dwórnišćo jo pśisamem prozne. Jaden luź tam hyšći źěła, jano pór góźiny, w nocy nic, gaž tam śěgi njejězdźe. Gmejna jo se ten dom kupiła, ale hyšći njejo jasne, co dej se z nim staś. Bydlenje by mógało tam nastaś, a naraźiło jo se tež tam załožyś źěłaŕnju za kólasa, źož mógu se wósebnje turisty, kólasa wupóžycyś.

Pśi droze do jsy śi do wócowu bijo wjeliki plakat, na kótaremž gmejna Dźěwin/Groß Düben južo něnto wabi za wjeliki koncert ze znateju spiwaŕku ze Šwicaŕskeje, a to w juniju 2021. To su wjelike optimisty, pśi sebje myslim.