Z Města/Cottbus. Wót kóńca oktobra maju w klubowni Serbskego domu w Chóśebuzu nowu rědnu wustajeńcu, ako jo napšawdu něco wósebnego a njewšednego. Bóžko pak njejsu mógali ju oficialnje wótwóriś. Lodka, ako jo tak ako pśecej zasej pśigótowała, pak ma naźeju, až snaź wót decembra ten, ako to co, ju woglědaś móžo.

Nowa wustajeńca nas wjeźo do serbskeje historije slěpjańskeje wósady. Wolfgang Kotisek z Brězowki, dłujkolětny wjednik slěpjańskego Serbskego folklornego ansambla a znaty spiwaŕ a gerc, ga jo gromaźe z drugimi zběrał w Slěpem a wokolnych jsach historiske stare fotografije ze serbskimi swajźbami. Wokoło 150 takich jo namakał a dostał a za wětšy źěl jo je z moderneju techniku tak wobźěłał, až móžoš na nich wjelgin derje póznaś swajźbarjow a swajźbaŕki w jich kšasnych pisanych serbskich drastwach. Z togo jo zestajił wustajeńcu, ako jo pśiwabiła lětosa wjele narskich woglědari do Serbskego kulturnego centruma we Slěpem.