Z Kopenhagena/Kopenhagen. To socialdemokratiske kněžaŕstwo w Dańskej planujo nowu kazń. To pišó na pśikład „Der Nordschleswiger“, casnik nimskeje mjeńšyny w Dańskej, ako ma swójo sedło w Apenrade (Affenråe/Åbenrå).

Pó tych rozpšawach jo dańske kněžaŕstwo wózjawiło swóje kazniske wótmyslenja za parlamentariske lěto 2020/21. Na 29. boku dokumenta stoje styri kazniske dypki cerkwinego ministaŕstwa, kótarež kněžaŕstwo co pśesajźaś. Slědny dypk pótrjefijo namšy. Cel wótmyslenja jo, pówětšyś transparencu nabóžninskich zapowědanjow a prjatkowanjow w kraju, gaž njejsu w dańskej rěcy. Stakim co kněžaŕstwo zagasyś prjatkowanja, w kótarychž zawołaju ku gramośe, intolerancy a namócy.