Z Města/Cottbus. W Centrumje za cłowjeske pšawa (CCP) jo był wóswěśony wopomnik za smjertne wopory na granicach zeleznego zapowjeska a barlinskeje murje. CCP jo startował z twarjenim pśi 50. jubileju twarjenja barlinskeje murje,13. awgusta 2011, pśi wopomnjeńskej akciji „Jaden cygel na jaden wopor murje“.

Tysace wobydlari Nimskeje demokratiskeje republiki (DDR) su wopytali pó twarjenju murje pó zemi, pówětšu abo wóźe wuběgnuś. Někotarym jo se wuběganje raźiło, druge pak su musali pśepóraś wjele lět swójogo žywjenja w popajźeństwach DDR. Sta wuběgańcow su swójo žywjenje pśi barlinskej muri abo na nutśikownonimskej granicy, pśi Baltiskem mórju abo na granicy z pódzajtšnoeuropskimi krajami zgubili. Na tych luźi co CCP na městnje wopomnjeś, kótarež jo něga było typiske popajźeństwo za wuběgańcow z DDR a kótarež jo źinsa wopomnišćo.