Z Barlinja/Berlin. Nazymska synoda krajneje cerkwje jo była wót 21. do 23. oktobra, synoda w nalěśu jo była wótgronjona. Tšojenje wót gójenja chromego jo było zakład za nabóžninu nazymskego zejźenja krajneje synody. Promštowka (Pröbstin) dr. Christina-Maria Bammelowa jo prjatkowała w Marijnej cerkwi. Korony dla jo wóna jano była pśez internet zwězana z wósadu a wobźělnikami synody. Glědajucy na to zejźenje jo teologowka wuskoboźiła ten nejžwušy gremium (to ta synoda jo) Ewangelskeje cerkwje Barliń-Bramborska-šlazyńska Górna Łužyca (EKBO): Gaž regule zastajaju drogu k Jezusoju, ga wóne regule deje byś změnjone, jo była jeje powěsć. Christina Bammelowa jo celebrěrowała nabóžninu z fararjom Gregor Hohberg (wót Marijneje cerkwje) a krajneju wobstarowaŕku spiwanja Cornelia Ewaldowa z małym chorom.