Ze Złego Komorowa a z gmejny Sprjewiny Doł/Senftenberg und Spreetal. Wóngano stej se LMBV (Lausitzer und Mitteldeutsche Bergbau-Verwaltungsgesellschaft mbH) a gmejna Sprjewiny Doł rozgranjałej wó pórěźanju B 97 a wó pśichodne wužywanje Jazora Sprjewinego Doła. Na zajmy gmejny deje se pśi wobyma pśedewześoma źiwaś. To pódšmarnjo Kath-leen Hofmannowa-Mičkowa (Mitzschke), casnikaŕska powědaŕka LMBV. Z boka LMBV stej za blidom sejźełej jadnaŕ Bernd Zabłotny (Sablotny) a Gerd Richter, wjednik wobłuka „saněrowanje Łužyce“. Za gmejnu stej powědałej šołta Manfred Heine a gmejnski raźc Hans-Jörg Herholz.

Zastupnika gmejny rozmějotej, až co LMBV až do kóńca nowembra B 97 pórěźiś a zrownju planowanja za dłujkodobne zasadne saněrowanje doprědka spóraś. Manfred Heine jo pak na to pokazał, až dejało se teke mysliś na pśizamknjenje (Anbindung) za kólasowarjow. „To by był wopacny signal, drogu zasadnje saněrowaś a sćažku za kólasowarjow spóromje drogi zabyś“, jo wón měnił. Wobej boka stej wuzwignułej, až zastojnstwa za nadrozny wobchad na ten part dejali te notne procese wjasć.