Ze Žylowa/Sielow. W Žylojskej zakładnej šuli „Lutki“ jo spisowaśelka Jill-Francis Ketlicojc alias Źilka pśewjadła premjeru swójeje źiśeceje twóŕby „Wuchack głupack a druge tšojeńka“. „W Žylojskej šuli som sama była wuknica, toś som se žycyła, až w toś tej šuli se knigłowa premjera mójeje prědnicki pśewjeźo“, jo pśiznała wóna Nowemu Casnikoju.

W dwěma kupkoma jo wóna w tej šuli pśedcytała wubranej tšojeńce. Prědna kupka jo měła 25 wuknikow z tśeśeje a prědneje klase, te z tśeśeje z cuzorěcneje wucby, te z prědneje witaj-źiśi. Druga kupka jo měła 33 wuknikow z tśeśego a stwórtego, z kótarychž jo wjele było z witaj-wucby. Cytanje jo wótwóriła Madline Gjarźic, wjednica teje šule.