Z Města/Cottbus. Sobotu tyźeń jo startowała wót chóśebuskeje Měsćańskeje hale prědna „Kidical Mass“ w Měsće. To jo kólasowa demonstracija za źiśi a dorosćonych za lěpše sćažki za kólasowarje. Kólasowy korso za źiśi, młodostnych a cełu familiju jo se slědny kóńc tyźenja w něźi sto nimskich městach wótměł. Pla nas su kólasowali wušej styri kilomejtari pśez centrum města na puśach a sćažkach, ako su se teke za źiśi góźili. Tych wokoło sto źiśi ze swójimi starjejšymi a starymi starjejšymi su słužbne awta policije zawěsćili. Z teju akciju w Měsće su w ramiku lětosnego swětowego dnja źiśi teke wěste kólasowe sćažki k šulam pominali. Pśewjele źiśi a młodostnych jo wót starjejšych kuždy źeń k jich celam dowózonych, měni Birgit Heinowa (Heine) wót Powšyknego nimskego kólasowego kluba (ADFC) w Měsće. „Gaby mógali na za nich se góźecych sćažkach z kólasom do šule pśiś, abo k sportowemu towaristwoju, na muzikowu wucbu, do kina abo k pśijaśelam, to by wóni malsnjej nawuknuli, sebje w měsće orientěrowaś a samostatny byś.