Z Rogowa/Ragow. Chtož co se woglědaś něgajšne groźišćo w lubnjojskem měsćańskem źěle Rogow, ten ma špatne šanse. Hynac pak jo, gaby mógał ze swětnišća dołoj glědaś. Archeologi su zwěsćili, až wóny tencas w pśeměrje něźi sto meterow šyroke groźišćo jo se wokoło lět 890 a 893 wót Słowjanow natwariło.
W běgu lět su jo powdali. Něźi 50.000 kubiknych meterow wót něgajšnego groźišća su w lěśe 1866 za twarjenje zeleznicoweje trase mjazy Barlinjom a Zgórjelcom (pśez Chóśebuz) tak ako za twarjenje nasypow pśi Sprjewi a sprjewinych zaběgow wokoło 1935 wužywali. Znaty chronist z Błotow Paul Fahlisch (1844–1930) pišo, až 1860 su hyšći młoge zbytki togo załožka ako fundamenty, štomy a zanjasone kamjenje widobne byli.
W 1960tych lět su bury směli jano na arealu tegdejšego groźišća a jano až do dłymokosći wót 25 centimeterow łuku ryś. Na fotografijach sowjetskeje armeje z lěta 1953 su kontury něgajšnego słowjańskego groźišća hyšći wjelgin derje spóznaś. Źinsa pokazuju fota ze swětnišća te wšakorake wegetaciske faze a źož ten kulowaty załožk jo był. Dołojce na samej łuce dajo jano pór njerownosćow widanje wót njogo.