Ze Słopišcow/Schlepzig. W lěśe 1985 jo se we błośańskej jsy Słopišća prědna rolnikaŕska wustajeńca w nowo załožonem Burskem muzeju pśedstajiła. Wóna se až do źinsajšnego na wusokem niwowje dalej wjeźo a se rozšyrijo – w toś tom jadnučkem muzeju w Dolnych Błotach.
Ako su pśed 35 lětami cłonki gmejnskego zastupnistwa, domowniske slěźarje a wejsne chronisty źinsajšny Burski muzej załožyli, nejskerjej njejo se jim widało, až ten objekt by wordował take woblubowane pśiwabnišćo za pśijaśele rolnikaŕskich stawiznow, techniki a wejsneje kultury. Kužde lěto woglědaju tysace turistow, dowolarjow, stawizniskich slěźarjow a zajmcow do togo muzeja, ku kótaremuž słušaju bydleński chrom, swěźenišćo, brožnja, pólna brožnja, groźi, pjakaŕnja a zelowa zagroda. „Mamy woglědaŕki a woglědarje z Nimskeje a z wukraja, ako pótom zagórjone a z wjelimi nowymi dopóznaśami naš muzej spušćiju“, groni Sabine Kampradowa, kótaraž jo ako wjednica muzeja wót 1997 za to historiske wustajanišćo zagronita.