Z Pódstupima/Potsdam. Lětosa ma Bramborska prezidentstwo w zwězkowej raźe a jo dla togo góspodaŕ za swěźeń k dnju nimskeje jadnoty. Korony dla su změnili koncept wót zarědowanjow na wustajeńcu pód gołym njebjom. Toś se prezentěruju na wšakich městnach w Pódstupimje wót 5. septembra do 4. oktobra Nimska, Bramborska, wšykne zwězkowe kraje a wustawowe organy. Serby su teke pódla – na dwěma městnoma pśed krajnym sejmom. K prědnemu: W pśeglěźe slědnych 30 lět se dopomina na statne dogrono za Załožbu za serbski lud (1998).

K drugemu: Pód motom „Dwójorěcnje smy južo dawno. – 1 m² wjelerakosći wót 29 m² Bramborskeje“ jo k wiźenjeju dwójorěcna Łužyca: něgajšny wuglowy region (wugel a stara turnojska wejsna tofla z casa ako „Zollgrenzbezirk“) a pśichod kultury a wědomnosći (měsćańska tofla uniwersitnego města Chóśebuz, pokazk na serbske nałogi ako imaterielne kulturne derbstwo Nimskeje). Pśidatnje su wustajone serbska chórgoj, Bramborska krajna wustawa we wobyma rěcoma a z artikelom 25 (pšawa Serbow) tak ako mały informaciski tekst.