Ze Žylowa/Sielow. Z Martinu Baumgartoweju dejali luźe z wjelikim respektom wobchadaś. Wšak jo wóna pó źaseś lět w chóśebuskej źiśowni za zbrašone a njezbrašone źiśi źěłała. Do togo jo wuknuła na gójecu pedagogowku. Něnto jo wóna se nowe źěłowe městno wupytnuła, w žylojskej Witaj-źiśowni „Mato Rizo“.

Wótběg wšednego dnja jo drje pódobne we tych wšakich źiśownjach. Źiśownja „Mato Rizo“ pak jo kradu hynakša ako druge - wšak dej how ceły źeń byś rěcna imersija. Na taki part dawaju tudy źiśam serbsku rěc dalej. To groni: Wótkubłaŕki deje ceły źeń serbski powědaś. To jo za Martinu Baumgartoweju hyšći „nowa zemja“. Doněnta jo měła serbske zwiski pśez jeje starku Helgu Langowu. Zwisk jo teke rosł pśez Baumgartojc góleśi, mały Karl ze swójimi šesć lětami jo šeł a wjeliki bratš Emil (wón jo styri lěta stary) hyšći chójźi do teje Witaj-źiśownje w Žylowje.