Z Města/Cottbus. Chtož to njeźaržyjo, což jo drugemu zlubił, chtož ma drugich za naru, tomu nicht wěcej njewěri. Hyšći wěcej, gaž jo se take cesćej stało. A w tej roli stej tuchylu firma EKZ Stadtpromenade GmbH a jeje jadnaŕ René Becker.

Pó lěśe 1995 jo w centrumje města wšo to rozpadnuło, což běšo se w casu DDR tam twariło, a jadno twarjenje za drugim su pón wótryli – dłujki błośański móst, woblubowanu kafejownju „Sternchen“ a te pawilony ze wšakimi lodami. A co něnt? Dłujko su wó tom pśemyslili, a w lěśe 2006 jo pón priwatny inwestor – ga EKZ (Einkaufszentrum) – cełe wjelike grunty wót „Treuhand“ kupił. Su ga měli prědk, tam twariś wjeliku kupnicu z dwěma źěloma. Ten prědny – ten Blechenowy Carré – jo był pón 2008 dotwarjony. Za drugi źěl su měli teke twaŕske plany. Ale pśecej zasej jo se ten termin za twarjenje pśesunuł, wót lěta 2012 južo dogromady wósym raz! Jim su raz pjenjeze felowali (drugi źěl ga dej płaśiś 25 milionow euro), pón zasej su pśeměnili te plany za twaŕski projekt a architekturu. Pśecej pak stej EKZ a René Becker městoju zlubiłej, až to wšykno buźo.