Z Lubnjowa/Lübbenau. Lětosa pśi olympiskich lěśojskich graśach 2020 w Tokio by lubnjojski twarjaŕ cołnow Thomas Lubkoll (lětnik 1958) pśewšo rad zasej wuběźowanje we wjasłowanju pśeslědował. Ale korona-pandemija jo zawinowała pśesunjenje tych graśow do lěta 2021. Tuchylu Lubkoll njama ambicije, aby sobu wójował wó olympiski drogotny metal. Ale móžomy zajm na to chyliś, až jo Lubkollojc rucnikaŕska familija w zachadnosći južo nimskemu narodnemu mustwoju k olympiskemu drogotnemu metaloju pśipomogła. A kak?

XI. olympiske lěśojske graśa za lěto 1936 su pśišli do Barlinja. Južo te VI. oplympiske lěśojske graśa 1916 su dejali se wótměś w nimskem głownem měsće, ale Prědna swětowa wójna (1914–1918) jo tomu sportojskemu pśedewześeju zadorała. W slědujucyma dwěma lětźasetkoma jo se teke politiska situacija w Nimskej změniła. Režim Hitlarja jo 1933 do mócy pśišeł. Jo kśěł swětoju wjelikosć, mócnosć a pśemóžnosć demonstrěrowaś. Jo jasno, až su tek wšykno wopytali, aby ako nacija z „kokulateju kśicu“ z wjele olympiskimi dobyśami se błyšćili.