Z Mužakowa/Bad Muskau. Teke, gaž ramikowe wuměnjenja kulturnego žywjenja su se dla korona-pandemije změnili, njejsu se změnili zasadne wuslědki wótnjedawna pśedlažecego pśespytowanja „Kulturna strategija Łužyce 2025“ („Kulturstrategie Lausitz 2025“) – tak pišo nawjedujuca awtorka teje studije dr. Martina Taubenbergerowa w zawodnem słowje. We łońskem maju jo Pśichodna źěłaŕnja Łužyca (ak swójo sedło w Mužakowje ma) wšakim awtorkam nadawk dała, naźěłaś tu studiju, kótaruž něnto wólodowaś móžośo na zw-lausitz.de, gaž źośo do menija a pón na „Downloads“. Awtorki tam identificěruju wupominanja (mjazy drugim felujucu mobilitu) a potenciale (mjazy drugim serbski lud ako kulturnu ressource) za Łužycu a naraźiju źaseś napšawow k zwopšawdnjenju – mjazy drugim natwaŕ kulturnych kśicnišćow (Knotenpunkte) na jsach, wutwaŕ regionalneje filmoweje kultury a internacionalizěrowanje Łužyce. Pódaju tek wuslědki w ramiku studije pśewjeźoneju online-napšašowani – jadno k strukturje zastojanja kultury we Łužycy, druge k wuměnjenjam kulturnego źěła we Łužycy.