Vanessa Thielojc jo dolnoserbsku rěc južo wót źiśownje wuknuła a co wordowaś wucabnica za serbšćinu. Dnja 19. junija dostanjo swójo wótzamknjeńske wopismo źaseteje rědownje wót bórkojskeje wušeje šule „Mina Witkojc“. Normalnje by wóna w pśedmjaśe serbšćina swójo wustne pśespytowanje měła, ale dla korony su na tej šuli te wustne pśespytowanja wupadnuś dali, jano te pisne su se wótměli. 
Z Bórkow/Burg. Dnja 19. junja dostanu wukniki a wuknice źasetego lětnika bórkojskeje wušeje šule „Mina Witkojc“ swóje wopisma. Teke Vanessa Thielojc ze Žylowa pón swój dopokaz wótzamknjenja za źaseś lět šule w rukoma změjo: „Se wě jo to tužne, až njamóžomy žedno rědne swětosne zarědowanje k wótzamknjenju gótowaś, ale wó wjele wažnjej mě jo, až mój wuslědk buźo w pórěźe. Z tym změjom móžnosć, mój puś tak hyś, ako som sebje to prědk wzeła“.
Ta 16lětna pójźo pó lěśojskich prozninach na Centrum wušego schójźeńka I w Chóśebuzu (Oberstufenzentrum Cottbus). How co wótpołožyś abituru a pótom w Lipsku na wuceński amt studěrowaś. Jeje cil jo wordowaś wucabnica za serbšćinu. Notne zakłady za to pówołanje su se pla njeje južo w źiśowni zapołožyli.