Z Dešna/Dissen. Togo se Elisabeth Batramowej cowało njejo! Až wěcej ako 100 luźi k swětkam 2020 na jeje dwór w Dešnje buźo se walaś, aby měli jadnu abo pór spódobnych štundow a wobgóspodarjowane byś. Situacija jo była malsnje rozjasnjona. To jo tola dom wóneje Elisabeth Batramoweje, slědneje wobydlaŕki doma. Dom ga jo wěcej ako 10 lět we wobsejźenju jsy Dešno.

K spomnjeśu na Elisabeth Batramowu su dom pomjenili z mjenim, z kótarymž su jej wołali: „Liska“. Mjazy starymi źiwnymi sćěnami jo nejpjerwjej był wejsny wobchod zaměstnjony, nježli až pśiwabijo pśed tśimi lětami kafejownja-lodaŕnja woglědarje. „Gaž su nam barlinske wótnajmarje na kóńcu slědneje sezony signalizěrowali, až njepódlejšyju dogrono za wobgóspodarjenje kafejownje, smy pytali za pšawymi naslědnikami“, dopomnjejo se Fred Kaiser na situaciju kóńc lěta 2019.