Z Tšupca/Straupitz. Pó młogich mjasecach wobgranicowanjow pśez korona-pandemiju jo se pětk, 5. junija, „Stary žytowy skład“ w Tšupcu zas za zjawnosć wótwórił. „Smy južo pśez swětki ze zastojnskim pśizwólenim wótcynjone měli“, groni Ingrid Walterowa wót Kružka pśijaśejow Žytowego składa z.t., a jo dodała: „To jo był rědny wuspěch z wušej sto woglědarjami.“ Ale hyšći płaśe wobgranicowanja a hygienowe napšawy pśi woglěźe historiskego muzejowego twarjenja. Gósći deje nagubki nosyś a wótstawki doźaržaś. „Woglědarje sami wjelgin kradosćiwje na napšawy źiwaju“, zwěsćijo gójcowka za powšyknu medicinu Simone Seelingerowa, ako dolnoserbsku rěc perfektnje rozmějo a powěda – roźona Bórkowaŕka jo pśed studiumom mediciny Dolnoserbski gymnazium w Měsće absolwěrowała.