Z Mužakowa a Kromole/Bad Muskau und Kromlau. Pópšawem se něnto w nalětnem casu mjerwi w Mužakowje z woglědarjami a gósćimi. Njepśijědu howko jano dla togo, aby se wuchójźowali we znatem a kšasnem Pücklerowem parku, ale młoge z nich tež togodla, aby nakupowali to a druge na pólskem marku ned za Nysu, za granicu. Něnt pak jo taki pisany „program“ wjelgin wobgranicowany. Pólska ga jo granicu zawrěła, zacyniła dla korony a swóju granicu kšuśe šćita. A z tym teke mark a pólski źěl parka, kenž jo w cełem 830 hektarow wjeliki a kótaryž jo dał wjerch Hermann von Pückler (1785–1871) w lětach 1815–1845 twariś. Rowno tak ako pózdźej park w Rogeńcu pla Chóśebuza. Z lěta 2004 jo „Park Mużakowski“, ako pó pólsku tomu parkoju gronje, ako UNESCO-projekt kšuśe šćitany, ten nimski rowno tak ako ten pólski źěl. Wósebny raz parka ga jo ten, až jo pó engelskem stilu załožony a na taki part jo wón sobu ten nejwětšy a nejrědnjejšy pó cełej Europje.