Z Města/Cottbus. Slědne tyźenje su byli wupominanje za starjejše. To jo rozgóriło Juliu A. a Süßbrichojc Nadine, wónej stej wołałej na zjawny protest pód motom „Źiśi maju pšawa!“ Swóju njespokojnosć su luźe dejali pokazaś z tym, až spóraju źiśece crjeje pśed měsćańskeju radnicu. To su starjejše pónjeźele gótowali. Wěsta licba mamow jo stojała pśed radnicu a wulicowała wót problemow. Jadna maś jo groniła: „Stanu zajtša zeger 5:30, pón źěłam w homeoffice. Gaž źiśi su wócuśone, ga pśigótuju fryštuku. Pón jo wucba a graśe. Pón warim wobjed a rěšym. Gaž cłowjek pśiźo wót źěła, du ja do firmy, a źěłam do zeger 21. To jo napinajuce.“ Druga mama jo groniła: „Mam ‚systemrelewantne’ źěło a mam to pšawo, góleśi spóraś do nuznego wótwardowanja. Tam pak njejo dosć městna. Wjednica źiśownje dej rozsuźiś, kake starjejše su za nju relewantnjejše. To jo kał.“ Wulicowali su teke, až njejo dosć wótkubłaŕkow za nuzne wótwardowanje. Jadna jo groniła: „Wjele wótkubłaŕkow źěła šesć góźinow. Wšake wót nich kśě dlej źěłaś. To by pólěpšyło situaciju.