Z Dešna/Dissen. Kradu hynac ako howac, gaž nowa wósebna wustajeńca se wótwórijo, jo to w Domowniskem muzeju Dešno slědnu njeźelu wótběgnuło. Normalnje se tam zachopijo zarědowanje k wótwórjenim wustajeńce zeger 15:00, a te rumnosći su połne gósći. Tenraz, ako su prezentěrowali nowu wustajeńcu wó „Zwěrjetach a rostlinach Sprjewinego ługa“, njejo konkretne zarědowanje dało, take dla korona-pandemije ga njesměju gótowaś. Tak su jadnorje pšosyli na woglědanje wobrazow wustajeńce. Ale tek z wuměłcami su woglědarje mógli se rozgranjaś.
Na tśi góźiny su tu njeźelu muzej wótwórili, něźi 50 gósći jo w běgu togo casa pśišło. A su na wótstawki wótpowědnje tuchylnym póstajenjam kradu źiwali. Pśecej jano jadnotliwce su se te wušej 50 wobrazow w rumnosćach noweje wósebneje wustajeńce woglědali, a wjele z nich jo z masku pśišło, rownož winowatosć k nosenju maski tam jano za sobuźěłaśeŕki a sobuźěłaśerje płaśi.