Ze Žylowa/Sielow. K lětosnemu 50. jubilejoju žylojskego swětkownego turněra jo to dejało wordowaś ten nejwětšy rejtowański a skokaŕski turněr, kenž Žylojske rejtowańske towaristwo jo kśěło pśijaśelam kó­njecego sporta ku swětkam na swójom wupyšnjonem załožku w połnocy Chóśebuza póbitowaś. Predikatowy turněr klase S***, ako how njejo hyšći dało, jo to dejał wordowaś, pśi kótaremž su dejali nimske a mjazynarodne renoměrowane rejtaŕ-kóń-póry pśi skokaŕskich pśepytowanjach na parcoursach se wuběžowaś.

„Ale dla wósebneje situacije tych dnjow, ako zakažo wjelike zarědowanja, smy musali ze śěžkimi wutšobami wšykne naše pśigótowanja zakóńcyś a našym dawno pśizjawjonym wobźělnikam k wěsći daś, až my toś ten wósebny turněr na swětki 2021 pśesunuś muse. Pón buźomy, kaž za lětosa planowane, skóńcnje naš 50. jubilejny turněr we wšen wjelikej formje wugótowaś, na co, se wě, gjarde smy. Ale te druge jubileje, ako my by 2020 raźi integrěrowali, njamógu pón wěcej tak w srjejźišcu stojaś“, tak jo gronił pśedsedaŕ rejtowańskego towaristwa Žylow, Dieter Pumpa.