Z Błotow/Spreewald. Kibutam a drugim łucnym ptaškam źo se w Łužycy a drugich stronach Nimskeje wjelgin ryjnje. Wina na tom jo intensiwne rolnikaŕstwo a něnto teke wjelika suš – dajo k wěsći bramborske ministaŕstwo za wobswět. To se wuznajo z datow, kótarež jo łoni nazběrała słužba za wobwachowanje natury (Naturwacht). Rozmjej, na teritoriumje biosferowego rezerwata Błota su wóni nalicyli 148 kibutowych pórow, ako su gnězda załožyli a wopytali měwaś, ale jano styri młode kibutki (!!!) su to lěto pśežywili a nawuknuli lětaś. To jo pśeliš mało, aby jich populacija mógła se źaržaś. Te gnězda laže we brozdach na mokšej roli abo we měłkich depach. Dla togo, až tśmjenjowate a parowate mokše łuki a pastwy wuschnu, mógu rubjažne zwěrjeta kaž liška a šup (Waschbär) lažćej je namakaś a jaja wubraś. Teke kanje, rybornaki a garony łakaju za jajami a młodymi.

Pósporomje kibutow su teke škurleje (Brachvögel) a bjakuty (Schnepfen) we wjelikej nuzy. Pjerwjej su we nižynje Małkse jich wjele było, něnto jano wjelgickano rědko wopytajo z casami jaden abo dwa póra měwaś.