Z Budyšyna/Bautzen. Nimsko-serbske ludowe źiwadło jo dla korony wše pśedstajenja až do 20. apryla, změstymi teke dalšne aprylske pśedstajenja, wótpowěźeło. To groni, až tśi serbske premjery dla pandemije zgubiju, mjazy nimi teke dwě produkciji, z kótarymaž su kśěli do Dolneje Łužyce pśiś.

Na jaden part to pótrjefijo komediju „Jaja z kraja“ Frederika Holtkampa, ako jo dejała měś swóju premjeru pó spócetnem planje sobotu, 18. apryla w Hochozy, a pón su dejali až do 3. maja styri dalšne pśedstajenja togo kusa w Dolnej Łužycy slědowaś.

Na drugi part to pótrjefi marionetowe graśe za źiśi „Mały Nykus“ – pó romanje Ottfrieda Preußlera –, ako su kśěli 28. apryla prědny raz we Witaj-centrumje w Chóśebuzu pokazaś. Wobej premjerje k planowanemu terminoju njebuźotej.

Madleńka Šołćic, dramaturgowka a druga na Nimsko-serbskem ludowem źiwadle w Budyšynje, groni k tomu: „Tej kusa wóstanjotej na kuždy pad na planje, se jano pśesunjotej. Ale na kótary dokradny termin se pśesunjotej, to hyšći njewěmy.“