Z Dešna/Dissen. Dla korona-krize jo Domowniski muzej Dešno tuchylu za woglědarjow zamknjony. Aktiwita how pak weto jo. „Kuždy źeń jo jaden wót nas kolegow w běrowje, aby my mógli doźaržanje wótstawka zawěsćiś“, groni Melanie Mykšowa (Müksch), sobuźěłaśeŕka muzeja, ako pśedewšym za źiśece projekty zagronita jo. „Móžomy se něnto młoge wěcy pśedewześ, za kótarež howacej cas njamamy“, wóna rozkładujo. Sama na pśikład jo skóro tyźeń na tom sejźeła, aby rozpokazanje za wupyšnjenje serbskich jatšownych jajow z wóskowańskeju techniku za źiśi wuźěłała, teke ze wšakimi musterowymi pśikładami. „To jo material za pśiduce lěto, gaž źiśi zasej do muzeja jatšowne jaja mólowat du.“