Wót septembera 2012 maju w Pódpołdnjowej Awstralskej serbsku tematisku rutu „Wendish Heritage Pioneer Trail“, kótaraž dopomina na serbske sedlarje z Łužyce. Wóna wjeźo interesěrowane drogowarje k šesćim nejwětšym serbskim sedlišćam we staśe South Australia. To su Hope Valley (něga Hoffnungsthal), Rosedale (něga Rosenthal), Ebenezer, Neukirch, St. Kitts a Peters Hill.
Wóni wšykne laže k pódpołnocy wót głownego města Adelaide. Tudy, we wokolnosći doła Barossa Valley, jo bejna licba serbskich luźi z Dolneje a Górneje Łužyce se srjejź 19. stolěśa wusednuła. Rutu jo ze statneju pódpěru natwariło tudske serbske towaristwo Wend/Sorb Society of South Australia, kótaregož pśedsedaŕ jo kněz Lyall Kupke.