Lube źiśi, ja se myslim, až wy to južo wěsćo: Něnto pśima nowa chórosć dlej a dalej wokoło se. Wina na tom jo grozny wirus, pomjenjony „korona“. Wy se pšašaśo: Dla cog‘ jo wón taki grozny? To ja wam rozkładu: Wón jo wjele mjeńšy ako nejdrobnjejšy prošk a se lažko rozšyrja. Gaž ten chóry tśichnjo, ga ceły roj tych wirusow leśi z jogo guby abo nosa wen. A joli, až druge luźe we bližy taki skazony luft zadychaju, ga krydnu wóni ten wirus teke. Někotare luźe schórjeju pótom na wjelgin śěžke zagórjenje płucow a maju tšach wó swójo žywjenje.

Pśez ten wirus njejo hyšći žedna srědnosć wumyslona, žedne chrapki, žedne tablety. Togodla jo něnto pśikazane, až luźe deje se jadne drugich wobijaś. A nejlěpjej doma sejźeś. Pótom njamóžo ten wirus na strowe luźe „pśeskócyś“. Jano starjejše a źiśi mógu gromaźe byś, teke bratš a sotša, gaž bydlitej gromaźe we jadnom bydlenju.

A bóžko, teke wy njesmějośo se z drugimi źiśimi zmakaś. Šule a źiśownje ga su tako zacynjone.

*