Kak se groni jsy, městoju abo sedlišćoju na serbski? Kótare dolnoserbske źinsajšne a něgajšne mjenja sedlišćow eksistěruju? Na te pšašanja móžo se wótegroniś z pomocu nowego internetowego boka Serbskego instituta. Jogo sobuźěłaśerje w Chóśebuzu su z wjelich žrědłow znosyli dolnoserbske mjenja sedlišćow, su material strukturěrowali a systematizěrowali. Wuslědk jo nowy informaciski serwis wó serbskich mjenjach online – nejžpjerwjej wó dolnoserbskich mjenjach sedlišćow. Na portalu www.dolnoserbski.de namakajo se ten nowy bok wótněnta ako źewjeta rubrika. Komfortabelne pytanje wólažcyjo wužywanje.

Dr. Hauke Bartels, a direktor Serbskego instituta: „Tematika serbskich swójskich mjenjow jo se w našom slěźaŕskem źěle pak raz jawiła a zajm za mjenja jo generelnje wjeliki. Toś smy se rozsuźili, aby natwarili nowy informaciski serwis wó serbskich swójskich mjenjach, kótaryž spśistupnijo kuždemu zajmowanemu daty ze wšakich žrědłow (ako pó źěłach njejsu digitalnje pśistupne) na komfortabelnu wašnju online.“