Lube lazowarje, ako wiźiśo – zapisk terminow jo we tom tyźenju prozny. Wšykne terminy, ako su byli we pśiducych tyźenjach w Casniku pśipowěźone, su něnto dla koronawirusa wótpowěźone.

Domowina wótpowěźejo oficielnje, nejpjerwjej za cas až k jatšam, wšykne swóje zarědowanja (Veranstaltungen). K tomu jo rozkładł jadnaŕ Domowiny Marko Kowar: „Wósebne case pominaju wósebne napšawy a pśedewšym dowěru a mjazsobnu pomoc. Korona-pandemija jo globalne wupominanje, ako móžo pśez zmužne jadnanje pód kontrolu spórane byś. How źo dłujkodobnje wó šćit wjele luźi a funkcioněrowanje našogo strowotniskego systema.“ Dla aktualneje situacije stej teke Serbski dom w Budyšynje a Serbski dom w Chóśebuzu za woglědarjow zacynjony. Regionalny běrow Domowiny w Chóśebuzu, Dolnoserbska biblioteka a kulturna informacija LODKA – zjawny pśistup how tuchylu wěcej njejo. Ale sobuźěłaśerje a sobuźěłaśeŕki budu zasadnje pśez telefon, e-majl abo post nadalej k dostaśu. „My comy, aby źěło dalej šło, gaž teke pód njewšednymi wobstojnosćami.“, groni Marko Kowar.

*