Z Cazowa/Zahsow. Ako te póry su se tudy we zalu kjarcmy do smugi gromadu stajali, jo Annett Sekyrina pśiwołała nam gjarda: „Źinsa jo skóńcnje mój syn Richard pódla“. Ten młoźeńc jo stupał gromaźe z Dypśojc Martinu (Düpsch). „Wu nas jo žeńskich pśecej wjele wěcej ako muskich, a togodla jo kuždy kjarl witany, ak co sobu gótowaś“, jo ta mama groniła. Wóna sama jo we pśeśěgu ze swójim cłowjekom (a Richardowym nanom) šła. A južo pśi prědnej staciji jo Richard swóju mamu zwjaselił, wuznajucy: „Ja se myslim, až znowa budu ja zasej sobu gótowaś. Wóno njejo tak zlě, ako som se zaprědka myslił. To gótujo napšawdu wjasele“. Bóžko, lětosa stej jano dwa młoźińskej póra sobu zapustowałej.

Gromaźe ze strobickimi gercami jo ta smuga zapustarjow śěgnuła pśez wjas a wustała pśi šesćich stacijach. „My woglědajomy wšyknym, ako maju we jsy něco groniś“, jo Annett Sekyrina nam k wěsći dała. Wóna jo šefowka wejsnego swěźeńskego komiteja, jo ten amt pśewzeła pó njabogem Ulliju Cleo.