Z Města/Cottbus. Ako nowy statny sekretaŕ kulturnego ministaŕstwa kraja Bramborska a zagronity za nastupnosći Serbow w Bramborskej, jo Tobias Dünow 9. januara prědny oficialny woglěd do Dolneje Łužyce pśedewzeł. Stwórtk, 5. měrca, jo se na swójom drugem oficialnem woglěźe w dalšnych serbskich institucijach z luźimi rozgranjał: W janšojskej šuli „Krabat“, w serbskej redakciji regionalnego studija rbb w měsće, w Rěcnem centrumje Witaj, w Šuli za dolnoserbsku rěc a kulturu, w Serbskem muzeju a w redakciji Nowego Casnika.

Woglěd w zakładnej šuli „Krabat“ w Janšojcach

Gósć jo tam na pśiraźenje wjednice šule Maunele Pyrczekoweje woglědał serbsku wucbu we tśeśej klasy – jeje wósebnosć lažy we tom, až chójźe do njeje zachopjeńkarje pósporomje takich, ako maju dobre pśedznaśa, a jaden gólc powěda serbski wót doma. A teke jadnogo zbrašonego tam maju, kótaryž póderbi wósebnego wótwardowanja.