Z Noweje Jsy/Neuendorf. Na lětosnem pśestupnem dnju (Schalttag), pótakem 29. februara, su Nowsanarje swój 123. zapust swěśili. Z19 młodostnymi a dorosćonymi pórami a ze 16 źiśimi – a te cele prězy, hyšći prědk kapały – su pó jsy śěgnuli połne nalětnego wjasela. A wjasołe su byli teke wjedra dla, ako jo jim dešć zalutowało a jim tam a sem samo ze swěśecym słyńcom wobraźiło.
Ako se to słuša, su woglědali k wažnym wósobnosćam jsy ako k pśedewześarjam a gmejnskim zastupnikam. Su cesne reje rejowali, kwětki pśepódali, paleńc póbitowali, jězu dostali a pilnje zběrali pósćenja za tudske Sportowe a tradiciske towaristwo. Pśedsedaŕ swěźeńskego komiteja togo towaristwa, ako mjazy drugim teke tudski zapust planujo a organizěrujo, jo južo pśez někotare lěta Helmut Geissler – rozmějo se, až teke k nim su zapustarje woglědali.