Lube źiśi,

som dostała list. Cytajśo sami!

„W źiśowni ‚Wila Kunterbunt‘ w měsće su 24. januara swěśili wósebnu ptaškowu swajźbu. Źiśi, wótkubłaŕki, wótkubłarje, starjejše a druge gósći su měli rozwjaselecu góźinku pśi dwójorěcnem programje z Marion a Matom (Zwergpiraten). Wóni su wiźeli (pupkowe) źiwadłowe graśe ‚Kokoška Suse co na ptaškowu swajźbu hyś‘. Źiśi su byli wufajnowane ako luštna šwita ptaškow. Se wě, až teke njejstej felowałej njewjesćinski pórik w dolnoserbskej drastwje a póbratš. Wóni su na cesnych městnach rědnemu programoju slědowali.

Dobry wótgłos publikuma su měli wšake zajmne muzikowe instrumenty a lubosnje wugótowana kulisa. Aktera stej małe pśiglědarje pśecej do pśedstajenja zapśimowałej – a wóni su pśi wjele scenach zagórjone sobu agěrowali. Někotare źiśi su mały źěl programa sami wugótowali. Na kóńcu su wšykne ten znaty ptaškoswajźbowy spiw spiwali a k tomu luštnje rejowali. Źiśi su z bytšymi wóckami slědk do swójich kupkow šli.