Z Rownego/Rohne. Stwórtk, 13. februara, jo se wótměło kuždolětne źěłowe rozgrono mjazy zastupnikami Domowiny a LEAG (Łužyska energija górnistwo AG a Łužyska energija milinaŕnje AG). Te slědne su pśilubili, až budu serbsku rěc a kulturu dalej pódpěrowaś. Zakład za gromadne źěło jo teke za 2020 to kooperaciske dojadnanje, ako stej 2007 Domowina a LEAG-pśedchadnik Vattenfall w zwisku z pśesedlenim Rogowa pódpisałej. Marcel Braumann, casnikowy referent Domowiny jo k tomu w informaciji za medije dodał, až w slědnych lětach su se mógali wušej 400 projektow w Dolnej Łužycy a wušej 800 w slěpjańskich stronach do statka stajiś, ako su se tek dokumentěrowali w lětnje wózjawjonych publikacijach. Na kšomje pósejźenja jo pśedsedaŕ Domowiny Dawid Statnik wugronił: „W toś tych rozgronach njejo Domowinje nigdy šło wó pšašanje ‚wugel jo abo ně‘, resp. ‚kóńc dobywanja energije z brunice pjerwjej abo pózdźej?‘, ale jo šło wó to, až se pód politisko-góspodaŕskim ramikowym wuměnjenjam na wažnosć nastupnosćow serbskeje rěcy a kultury źiwa.