Z Bórkow/Burg. Zakładna a wuša šula „Mina Witkojc“ w Bórkowach jo dostała dariki. Srjodu, 19. februara, jo Domowniska śpa Bórkowy pśepódała tej šuli źaseś toflow, ako jo było 2018 wiźeś w tej śpě ako wósebna wustajeńca k 125. narodnemu dnju basnikaŕki a casnikaŕki Mina Witkojc.

„Njejsmy kśěli, aby te informatiwne dokumenty w archiwje se minuli. Stej byłej dwě opciji, błośańska biblioteka abo zakładna a wuša šula. Wobej nosytej mě Miny Witkojc. Ale biblioteka ga njebuźo wóstaś, źož wóna jo, togodla smy se rozsuźili za šulu“, jo rozkładła wjednica Domowniskeje śpy Bärbel Schubertowa. Wjednica šule Manuela Schichanowa jo se tomu kradu wjaseliła. How wuknjo 440 źowćow a gólcow. Něźi 150 wót nich se wobźělijo na serbskej wucbje.

„Za mójich woplěwańcow su te dwójorěcne pokazowańske materialije něco wjelgin wužytnego. Tak mógu swóje znaśa serbskeje rěce wuproběrowaś“, jo se wjaseliła fachowa wucabnica Evi Zschörneckowa. „To jo wjelgin rědny źeń za našu šulu“, jo se teke wjaseliła něgajšna wucabnica serbšćiny Christine Köhlerowa.