Rybacki sedaju rad na gałuzy pśi wóźe. Njejo-li niźi žedna gałuz, ga wužywa wón teke žerźe abo tofle ako rozglědowe městko. Tak ako na fotografiji: Ryback jo se sednuł na nimsko-serbsku toflu za kajakarje a cołnarje, w Błotach, mjazy Lubnjowom a Lubinom, źož Wudrica (Wudritz) se wulewa do Sprjewje, pśi Rogojskej tšuze (Ragower Kahnfahrt). 
Ryback (Eisvogel) słuša k našym nejpisańšym ptaškam. Wón jo we cełej Bramborskej a Dolnej Łužycy žywy, glich we małej licbje: Pśi tšugach, rěkach a pśi stojecej wóźe.
Pó wjelikosći rowna se wón wroblikoju, ma pak oranžowy brjušk a zwjercha kšasne módre pjerka a cerwjeny šnapac. Gaž wón leśi, wuglěda kaž małka módra raketa abo drogotny kamjeń. Rownož jo taki pisany, njedajo se lažko wuglědaś, wósebnje gaž sejźi kšajźu niźi we chłodku na gałuzy. Ta swěśata módra barwa jo nejlěpjej widobna pśi leśenju, wósebnje gaž słyńcko swěśi.
K žywjenju pótrjeba wón cystu, pśewidobnu wódu, we kótarejž plěju małke rybki, k eksemplu šteklinki. Aby je łapił, musy wón je nejpjerwjej wiźeś, což we mutnej, njerěšnej wóźe njejo móžno.
Gnězdka twari wón we dłujkich zemskich rorach, ako sebje wuryjo abo wudrapjo na wusokem, napśiskem brjogu.