Z Chóśebuza/Cottbus. Dietmar Schulze ze Skjarbosća (Schorbus) jo prezentěrował stwórtk w Serbskem domje pśed 40 pśisłucharjami swóje nowe knigły: biografiju Kita Šwjele, šularja, kantora a 54 lěta redaktora Bramborskego Serskego Casnika.
Ideja za take knigły jo nastała pśi góźbje pisanja wejsneje chroniki. Ten pisaŕ Dieter Schulze jo pśi tom wuznał, až Kito Šwjela jo zapšawym ta jadna sama paršona we historiji Skjarbosća, kótarejež statki dosegaju dalej ako granice jsy, a jo togodla dostojna wósebnego wobspomnjeśa. Nejpjerwjej su stajili jomu pomnik, a něnto, dwě lěśe pózdźej, jo se wudała biografija.
A ta sama jo ceło wósebna. Pśeto awtor jo wužył doněnta njewózjawjone žrědła, mjazy drugim nimskorěcnu awtobiografiju z pjera Šwjele a jogo listy. Wušej togo jo wopisał góspodaŕske a politiske wobstojnosći, ako su se tencas kněžyli. Stakim móžoš je naglědaś ako wucbne knigły k regionalnej historiji, kótarež pak wót stila rownaju se změstymi romanoju. A wóni góźe se za našym suźenim ako pśedłoga za scenariske knigły.