Z Janšojc/Jänschwalde. Kradu rozwjaselone su swěśili prědnego februara tudy 144. zapust, na kótaremž jo se 22 pórikow wobźěliło. Za wjednicu młoźiny Sylvu Oehlertojc jo to był južo źewjety zapust. A Justina Markusojc jo lětosa swěśiła źaseślětny zapustowy jubilej. Swětosnje su do młoźiny pśiwzeli Mathiasa Noacka, Theresu Littichojc a Linusa Krokora, kótarež su něnto k prědnemu razoju zapustarje byś směli. To pak za Linusa Krokora z Radowize cele nowe nazgónjenje njejo, pśeto wótere lěta jo wón južo ako góle zapustojski pśeśěg ako clown a ako nosaŕ chóžyšća nawjedował. Něnto pak jo tak pšawje pśi tom, to jo južo něco drugego. „To jo wjelgin rědnje, taka dobra atmosfera. Gaž ten źeń tak dalej źo, ga buźo to wjelicnje!“, groni wón zagórjony.